Čoalkkehii uksii!
Sárá, Sunná, Ovllá ja Jánoš ledje oađđimin go juoga čoalkkehii uksii. Sii gulle olbmuid olggobealde. Politiija lea olggobealde ja dáhttu muhtuma sis mannat geahččat leat go amas olbmot kealláris. Sunná ja Jánoš manaiga keallárii. Sunná dohppestiivel šluppoha mielde. Muhto doppe ii lean mihkkege.
Kránnjááhkku muitalii ipmaša birra mii sutnje dáhpáhuvai mannan ija. Son gulai biilla boahtimin olggobeallái stobu ja gulai olbmuid boahtimin tráhpa bajás ja bohte stohpui. Son njuikii olggos klássaráiggi ja viehkalii kránnjáádjá geahčai riŋget politiijai.
Girječálli lea čállán girjji olbmo balu birra. Erenoamážit go olmmoš lea árgi, de sáhttá iežas baldit ja gullat ja oaidnit niehkameahttumiid maid earát eai oainne eaige gula. Go ballá, de jurdagat jorret ja sáhttá ieš smiehttat vel dakkáriid ge mat eai heive jurdagii go olmmoš ii leat ballán.
Dán girjji váldopersovnnat, nieiddaš Sunná ja kránnjááhkku, leaba goappašagat ballán vuos go nu sakka guovssahastá olgun ja doapmaba goappašagat giddet klássaliinniid vai ii oro nu issoras.
Sunná balai ahte «diet muhtin olmmoš» soittii bávččagahttit su oappá Sárá ja su viellja Jánoža go manaiga kealláris ohcat gii doppe lea. Sunná balai maiddái ahte ammal «diet muhtin olmmoš» gal lei jo njáhkan loktii su oađđenlatnjii ja čiehkádan dohko, vai beassá su váldit fáŋgan.
Fáhkka ihte uksakárbmii čáhppes suorpmat ja Sunná nu suorganii, šovkkodii ja stirddui dasa gárvodettiin, iige šat fitnen buksaboalu gitta go suorpmat ledje nu stiivon ahte eai šat soja. Sárá ja Jánoš, geat leigga balddahallamin Sunná, healkkeheigga ieža ges go oinniiga oappáska steanžžeheamen láhttái.
Kránnjááhkku ges gullagođii biilla fitnamin iežas stobu olggobealde jorgaleamen. Smiehttagođii ahte dál dieđus finai «diet muhtin olmmoš» geahččamin ahte leago son ruovttus ja dieđusge boahttá ihkku su geahčai. Son čanai buot uksageavjjaid gitta báttiin, vai ii «diet muhtin olmmoš» beassat sisa nu ahte son ii fuobmá. Ieš čohkkedii gievkkanii vuordit.
De gullogođii ge biila olggobealde stobu, muhtun gullui skoahpamin tráhpa alde. Bođii feaskárii ja manai nuppi geardái. Kránnjááhku rabastii klása ja čohkkedii klássakárpma ala, vai lea gearggus njuiket olggos ja viežžat veahki go «diet muhtin olmmoš» boahtá kievkkanii su lusa. «Diet muhtin olmmoš» gullui boahtimin vulos nuppi gearddis kievkkana guvlui. Kránnjááhku gal čealádii olggos ja viehkalii viežžat veahki.
Girječálli
Girječálli Marit Kirsten Anti Gaup
Govva: Michal Aase / Davvi Girji
Máret Risten Anti Gaup lea riegádan 1960is ja bajásšaddan Kárášjogas ja ássá ain seamma báikkis. Son lea náitalan ja leat guokte máná ja golbma mánáidmáná.
Boazodoallu lea sin bearraša guovddážis ja sis lea bearašdoallu. Son bargá ekonoman Davvi Girji girjelágádusas mii bargá ovddidit giela ja kultuvrra. Son lea politihkkár ja servodatberošteaddji.
Girječálli ieš dadjá ahte son lea dihtortastatuvrrain deattašan tállaid badjel 30 jagi ja sáhttá dadjat ahte tállat leat áiggi mielde njuhttojuvvon bustávvan ja dát lea su nubbi mánáidgirji.
Dál lea gavpi.org filmmaš ilbman mas girječálli muitala iežas girjji birra.
Illustratøra
Sunna Kitti lea sárgon čáppa govaid girjái.
