Elsa ja Jovnna nu ilosmuvvaba go fuomášeaba ahte sirkus lea boahtime gillái. Vuordiba ahte vuordiba beaivvi goas sirkusdoalut galget, dego livččiiga duhát jagi vuordán. Go viimmat sirkusbiillat jovdet ja sirkustealttát ceggejuvvojit, de ferteba ovttatmano sihkkelastit geahččamin. Oh, kloavnnat, amas eallit ja lášmadis olbmot. Man somá!
Guhkes vuordináigi lea nohkan ja dál giliolbmot viimmat besset suohtastallat sirkusdoaluiguin. Muhto de leaviha sáhka, ahte sirkusa elefánttačivga lea láhppon. Elefánttačivgga haga eai šatta doalut. Mo dál?
Elsa ja Jovnna searvaba elefánttačivgga ohcanakšuvdnii. Measta buohkat gilis servet. Lea gal imaš ahte stuora máilmmi elefánttačivga sáhttá dušše láhppot. Lea go son suoláduvvon? Vuolgge don ge veahkkin ohcat láhppon elefánttačivgga!
Dál go eahkedat leat gerpmodišgoahtán ja lastat ruškkodišgoahtán, de heive ođđa girjji logadit. Ingá Elin Marakatt lea čállán gelddolaš mánáidgirjji Elssa ja Jovnna birra geat veahkkálagaid čoavdiba hástalusaid. Dialogat ja somás dadjanvuogit dagahit girjji hui suohtasin. Muitalusa lea álki čuovvut danne go leat oanehis kapihttalat.