Girjealmmuheapmi
Nieguin nieiddaid niegut
Davvi Girji almmuha girjji Litteraturhuset, Bernes-salenis Oslos
Bearjadaga 27.10.2023 dii. 1800. Nuvttá doalut. Buresboahtin.
Girjjiin Nieguin nieiddaid niegut addá girječálli Karen Anne Buljo, jiena nissonolbmuide vai sin muitalusat ja vásáhusat eai galgga čihkkojuvvot, jávkat eai ge vajálduvvot.
Davvi Girji almmuha prosa- ja diktagirjji Nieguin nieiddaid niegut.
Dát girji lea ollesolbmuid várás ja lea veahkaválddálašvuođa birra nissonolbmuid vuostá.
Girjji muitalusain boahtá ovdan measta jáhketmeahttun olmmošmeahttunvuohta. Divttat addet jávohuvvon nissoniidda jiena. Eai dat dipmat muitalusaid garra sisdoalu, eambbo govvidit mo lea vejolaš veahkaválddálaš dilis birgehallat, ja ceavzit.
Jos ceavzá …
Čalbmáicuohcci lea mo nisu ii leat «ovttaskas olmmoš».
Son gulla olles sohkii, ja lea muhtinláhkái buohkaid biigá, lea buohkaid dorvu ja guoddá buohkaid árvvu. Muitalusat buktet dan gova ahte nissonat gártet sivalaččat jos guoibmi lea veahkaválddálaš, dahje jos earaláhkái vásiha veahkaválddálašvuođa. Stállu lea min gaskkas maid, ja nisu gártá gillát go lagamuččat eai ge doarjjo su.
Maŋimuš dikta, «Áhcážan», ge muhtin láhkái čohkke buohkaid muitalusaid ja vásáhusaid – ja ahte lea vejolaš addit ánddagassii, mii lea jo oalle stuorra dahku, ja oaffar.
